الترند اليوم: #حكاوي_الحصار

عبر صفحتها على منصة فيسبوك، ابتدرت ليمياء محمد سلسلة من المنشورات أطلقت عليها “حكاوي الحصار” لاقت رواجا واسعا بين رواد منصة فيسبوك.
https://www.facebook.com/lemia.mo7amed
وليمياء محمد تسكن مع عائلتها في أمدرمان، ومع اندلاع القتال وحصار الدعم السريع لمنطقة السلاح الطبي وسلاح المهندسين وجدت العائلة نفسها محاصرة في داخل المناطق التي تسيطر عليها القوات المسلحة. وبعد أن استعاد الجيش السيطرة على مناطق واسعة من أمدرمان، خرجت ليمياء محمد وعائلتها من هذه المنطقة ولم تكتف بذلك فقط، بل أطلقت هاشتاق #حكاوي_الحصار لتسرد من خلاله تفاصيل حياة العائلة تحت الحصار وعلاقة المحاصرين بالقوات المسلحة.

عن الغذاء تحت الحصار، كتبت ليمياء محمد
طبعاً من ضيق الحصار وإنو الأكل إنعدم تماماً والجنجويد مانع أي أكل يدخل المنطقة وكانو عاملين ليهم سوق في العباسية ، المهم في ناس بتمشي تجيب من سوق الدعامة ده وتجي تبيع لينا أصلاً ما كان في غير الرز والدقيق والعدس ووصلنا مرحلة بنشتري الكيلو الواحد بي ١٥ ألف ده لو لقيت أصلاً .

الناس تطلع من الفجر عشان تفتش كيلو الدقيق ولا الرز وبعد ده ما تلقى ، الحمدلله بدل الأخو هناك بقى عندنا من ضباط وعساكر زي ٣٠ أخو كدة فيهم إلي ما برتاح إلا يوفرو للعيال لقمة اليوم
الناس وصلت مرحلة تاكل صفق!! أي والله زي ما بقول ليكم
صفق المنقة إتفرم وإتعمل بالويكة .

كويس حلتنا بقى فيها شجرة الموليتا أول مرة ناكلها وطلعت زابطة شديد والله .
أكلنا دقيق وعدس الإسقاط البرموهو بالطيران كلو حصحاص وتراب وخيوط وقش.
أكلنا المسوِّس والمعتت والمدتو منتهية .
والحلو مر إتعمل عصيدة بي بهاراتو البتهرد المعدة دي.
أكلو العيش الناشف المعفن ليهو سنة الملان الوان قوس قزح اخضر وأسود “حسن وضياء كيف تمام” ومُصرين إنو طعمو حلو

رغم الضيقة دي كلها والله قدر إلي كُنا قاعدين في الحلة من ناس الحلة لي جيش كنا بنتقاسم اللقمة كلنا سوا وحامدين الله ما اتجزعنا والصبر كان سيد الموقف وعارفين ربنا أرحم لينا من أي زول وجزاء الصابرين حيكون عظيم

وعن الماء والكهرباء، حكت ليمياء محمد
بسبب الحصار على أحياء سلاح المهندسين كنا قاطعين موية وكهربا 7 شهور ، عدم الكهربا اتعودنا عليهو بس كان كل الماشي محل بيوت الطاقة الشمسية بجي يدق الباب ياخد تلفوناتنا يشحنوها لينا ، أما الموية كانت عربية الجيش بتجيب الموية للمواطنين كل يوم قدام البيت ، وكلمتهم الطيبة لما يتأخرو علينا وندق جرس ” يخوانا والله ما بتعطشو واحنا قاعدين” 🤍
وقد كان والله ما عطشنا وانتو قاعدين🤍ِ
تعديل:
الماسك الخرطوش ده الرائد / ضياء الحق
كلنا كنا واحد

#حكاوي_الحصار